വള്ളത്തോളിന്റെ ‘എന്റെ ഭാഷ‘ എന്ന കവിതയിൽ പറയുന്നത് പോലെ
“മാതാവിൻ വാത്സല്യ ദുഃഖം നുകർന്നാലേ
പൈതങ്ങൾ പൂർണവളർച്ച നേടൂ“
ശരിയാണ്, മലയാള ഭാഷ അമ്മയുടെ പാലു പോലെ മധുരവും ജീവൻ നൽകുന്നതുമാണ്. ജി ശങ്കരക്കുറുപ്പിന്റെ മധുരം, സൗമ്യം, ദീപ്തം എന്നീ വാചകം കടമെടുത്തു പറയുകയാണെങ്കിൽ മലയാള ഭാഷ ഏതൊരു വിദ്യാർഥിയുടെയും വിദ്യാ വികാസത്തിനും അതുപോലെ തന്നെ അവന്റെ വിജ്ഞാന മണ്ഡലം ഈ ഭൂലോകത്തിലെ അവന്റെ സ്വപ്നങ്ങളെ സാക്ഷത്കരിക്കും വിധം വിശാലമാക്കുന്നതിനും മാതൃ ഭാഷ അത്യന്താപേക്ഷിതമാണ്.
സ്വപ്നം കാണുന്ന ഭാഷയാണ് മാതൃ ഭാഷ. ഏതു അന്യഭാഷകൾ സ്വായത്തമാക്കിയാലും നമ്മുടെ ഹൃദയത്തിൽ സൂക്ഷിക്കുന്നതും മധുരമായി സംസാരിക്കാൻ സാധിക്കുന്നതിനും ആശയങ്ങൾ വിനിമയം നടത്തുന്നതിനും നമ്മുടെ ഹൃദയത്തിൽ നിന്നും ഉദ്ഭവിക്കുന്നതും നമ്മുടെ മാതൃ ഭാഷയാണ്.
ഭാഷാ പിതാവായ തുഞ്ചത്ത് രാമാനുജൻ എഴുത്തച്ഛൻ ക്രമപ്പെടുത്തിയ അക്ഷരമാല ക്രമമാണ് മലയാളത്തിനുള്ളത്. സ്വരാക്ഷരങ്ങൾ, വ്യഞ്ജനാക്ഷരങ്ങൾ, ചില്ലക്ഷരങ്ങൾ, കൂട്ടക്ഷരങ്ങൾ, എന്നിവക്കു പുറമെ മറ്റു ചിഹ്നങ്ങളും ചേർത്ത് അതിവിശാലമായ ഒരു ഘടന തന്നെ മലയാള ഭാഷക്കുണ്ട്.എന്നാൽ നാം ഇന്ന് സ്വീകരിക്കുന്ന രീതി ആശയങ്ങൾ, ആശയങ്ങളിൽ നിന്നു വാക്യം വാക്യങ്ങളിൽ നിന്നു വാക്ക്, വാക്കിൽ നിന്നു അക്ഷരം എന്നാണ്. കുട്ടിയുടെ പദസമ്പത്തു വികസിപ്പിച്ചുകൊണ്ടുള്ള ഒരു അഭ്യസന അഭ്യാസ രീതിയാണ് നാം സ്വീകരിക്കുന്നത്. അതുകൊണ്ട് കഥ, വാക്യം, വാക്ക്, അക്ഷരം ഇത് കുട്ടിയിൽ ഉറയ്ക്കുന്നതിന് വളരെ ഫലപ്രദമാണ്.
യു. പി തലങ്ങളിൽ മലയാള ഭാഷാ പഠനത്തിൽ കഥ, കവിത, വർണന, കഥാപാത്രനിരൂപണം, വിശകലനം, താരതമ്യം എന്നിവയ്ക്കു കൂടുതൽ പ്രാധാന്യം നൽകുന്നുണ്ട്.
മറ്റു ഭാഷകൾക്ക് പ്രാധാന്യം നൽകുന്ന ആധുനിക കാലഘട്ടത്തിൽ മലയാള ഭാഷയുടെ മഹത്വവും പ്രാധാന്യവും ഉയർത്തുക എന്ന് കൂടി മധുരം മലയാളം ക്ലബ് ലക്ഷ്യം വയ്ക്കുന്നു.